BOLISA WAOMBA MIFEREJI

Tarehe iliyowekwa: January 9th, 2018

Wakala wa Barabara Vijijini na Mijini Halmashauri ya Mji Kondoa wametakiwa kutengeneza mifereji pembezoni mwa barabara zilizofanyiwa matengenezo ili kuwa na barabara zinazopitika muda wote.

Hayo yamesemwa na diwani wa kata ya Bolisa Mh. Abed Boki alipokuwa akiongelea hali ya barabara ya kuelekea Bolisa kutoka Kondoa Mjini kwa kipindi cha mvua zinazoendelea kunyesha Kondoa Mjini.

Alisema kuwa barabara iliyotengenezwa imeanza kuweka mashimo makubwa pembezoni sababu hakuna mifereji ya kupitisha maji hali inayotishia kukatika kwa barabara hiyo kutokana na mashimo hayo ambayo yanaweza kupelekea kukatika kwa barabara hiyo na kukosekana kwa mawasiliano kati ya Bolisa na Gubali.

Ameongeza kuwa makorongo hayo yapo katika kijiji cha Itiso, Poisi na Bolisa  hivyo mamlaka hiyo iende kufanya utafiti mapema kabla ya mvua kubwa zaidi kunyesha na kuleta madhara zaidi kwani kutokana na mvua za sasa hali ya usafiri pia imeanza kuleta shida.

Akielezea chamgamoto hiyo Kaimu Meneja wa TARURA Kondoa Mji Bwana Wera Kweka amesema kwasasa barabara hiyo bado ipo chini ya mkandarasi MISPA CONSTRUCTION ambao wanaendelea na matengenezo na moja ya kazi katika mkataba ni kuweka makalvati na kufungua mifereji ili maji yawe na mwelekeo na kuepusha usharibifu wa barabara.

Aidha aliongeza kuwa kwasasa barabara iliyokatika hali mbaya ni ya Serya kwenda Mongoroma ambapo mawasiliano katika vijiji hivyo yamekatika na kuwaagiza wakandarasi waliopo katika maeneo hayo kujenga barabara hiyo haraka na kuhakikisha inapitika kipindi chote.