Dkt.Mkanachi awataka walimu wa Msingi kuvitumia vishkwambi kuongeza ufaulu

Tarehe iliyowekwa: January 23rd, 2023

Mkuu wa Wilaya ya Kondoa Mhe. Dkt. Hamisi Mkanachi amewataka walimu wa Shule za Msingi kwenda kuvitumia vishkwambi walivyopewa katika kuongeza ufaulu kutoka nafasi ya 3 kimkoa na kuwa wa kwanza kimkoa na 10 bora kitaifa.

Ameyasema  hayo wakati wa hafla fupi ya kukabidhi vishkwambi 257 kwa walimu wa Shule za Msingi za Halmashauri ya Mji Kondoa iliyofanyika katika ukumbi wa mikutano wa Halmashauri.

“vishkwambi hivi vikaongeze asilimia ya ufaulu kwa wanafunzi kwa kuwa kila mwalimu anapewa cha kwake na tusikubali tufanye mabadiliko kwa kuionyesha Kondoa  kama Kondoa na inawezekana,”amesema Dkt. Mkanachi

Aidha ameongeza kuwa pamoja na yote vishkwambi hivyo vikazibe upungufu wa walimu uliopo kwani itawaongezea uwezo wa kujiongezea maarifa kwa kuwa hiyo ni teknolojia na pia vitaongeza kuongeza hali ya wanafunzi kupenda shule na kupunguza utoro.

Ameongeza kwa kuwataka walimu kwenda kuvitumia vizuri vishkwambi hivyo kama ilivyokusudiwa ili vikalete tija kwa taifa hivyo wanapaswa pia kuvitunza vizuri kwa kuwa pia ni vitendea kazi vya taifa.

Halmashauri ya Mji Kondoa imepokea vishkwambi 257 kutoka Tume ya Uchaguzi kwa ajili ya walimu wa shule za msingi ambapo imefanyika hafla ya kuwapa walimu wote wa Shule za Msingi na mgeni rasmi alikuwa ni Mkuu wa Wilaya ya Kondoa.