Kondoa Mji Wapongezwa ujenzi wa Zahanati kwa mapato ya ndani

Tarehe iliyowekwa: September 12th, 2024

Wataalam kutoka Ofisi ya Rais TAMISEMI na Wizara ya Fedha wameupongeza uongozi wa Halmashauri ya Mji Kondoa kwa kujenga Zahanati ya Mtaa wa Ausia kwa kutumia mapato ya ndani zaidi ya shilingi milioni 72.

Pongeze hizo wamezitoa mbele kwa Mkurugenzi wa Halmashauri ya Mji Kondoa Ndg. Said Majaliwa na wajumbe wa menejimenti walioongozana nao wakati wa ziara ya kufanya ufuatiliaji na tathmini katika sehemu za kutolea huduma za afya.

"Kwa kweli Kondoa Mji mmefanya jambo zuri sana na la kuigwa hongera Mkurugenzi kutumia mapato ya ndani na kujenga zahanati kama hii ni jambo kubwa na tunaona wananchi wanapata tiba hapa hivyo ndivyo inavyotakiwa"amesema Ndg. Jane Shitindi mchumi kutoka OR TAMISEMI

Aidha amesema anatamani Halmashauri zingine ziige mfano huo ili kuwasogezea huduma muhimu ya afya wananchi katika maeneo yao na kuwashauri watendaji wa mitaa na kata kuwahamasisha wananchi kujitoa katika kuchangia nguvu wakati wa utekelezaji wa miradi ya maendeleo.

"Sisi tumekuja kufanya ufuatiliaji na tathmini ya fedha zilizotolewa na serikali katika kutekeleza miradi ya maendeleo kwa afya na ununuzi wa vifaa tiba ili kuona iwapo majengo yamekamilika na kutoa huduma iliyokusudiwa na vifaa tiba na kama vinatumika na kama havitumiki tujue sababu na kuitatua ili huduma iliyokusudiwa itimie"amesema Mchumi Jane

Akiongea kwa upande wake Mkurugenzi wa Halmashauri ya Mji Kondoa Ndg. Said Majaliwa amewashukuru wataalam waliofika katika vituo vyote vinavyotoa huduma za afya na kujionea hali halisi ni matumani yake kuwa ziara hiyo itasaidia kutatua changamoto walizoziona kwa ajili ya kuwasaidia wananchi wa Kondoa Mji.

Aidha ameongeza kwa kuahidi kuendelea kusimamia fedha zinazoletwa na serikali kwa ajili ya utekelezaji wa huduma za afya ili kuhakikisha miradi inakamilika kwa wakati na thamani ya fedha inaonekana.

Kwa upande wake mganga Mkuu wa Halmashauri ya Mji Kondoa ameomba serikali isaidie fedha za ujenzi wa uzio wa hospitali ili kuweka mazingira ya hospitali katika mazingira ya usalama.

Wataalam hao ni Jane Shitindi mchumi OR TAMISEMI, Endrew Komba Afisa Bajeti na Edward Magelewanya Mfamasia Ofisi ya Mkuu wa mkoa wamepitia vituo vya kutolea huduma vilivyopata fedha kutoka serikali kuu ambapo pia waliongozana na baadhi ya wajumbe wa Menejimenti.