Mapato ya Ndani Kondoa Mji Kufikia Bil 1.6 Bajeti 2019/2020

Tarehe iliyowekwa: February 7th, 2019

Mapato ya ndani ya Halmashauri ya Mji wa Kondoa yanatarajia kuongezeka kwa mwaka wa fedha 2019/2020 hadi kufikia Tshs. 1,636.958,528 kutoka Tshs. 837,526,000 iliyopangwa kwa mwaka wa fedha 2018/2019.

Ongezeko hilo lilibainishwa na Afisa Mipango wa Halmashauri ya Mji wa Kondoa Kaunga Amani alipokuwa akiwasilisha randama ya mpango wa bajeti kwa mwaka wa fedha 2019/2020 katika kikao cha baraza la waheshimiwa madiwani kilichofanyika katika ukumbi wa Kondoa Irangi hivi karibuni.

“Tumeamua kuongeza mapato ya ndani hadi kufikia bilioni moja kutokana na sababu mbalimbali zikiwemo kuongeza wigo wa vyanzo vipya vya mapato, kuimarisha usimamizi wa ukusanyaji wa mapato na tumeona hali halisi ya makusanyo kwa kipindi hiki cha miezi sita Julai hadi Desemba 2018 ambapo tumeshakusanya asilimia 62 ya makisio ya bajeti.”Alieleza Kaunga

Aidha aliongeza kuwa kwa ujumla halmashauri ya Mji imejipanga kukusanya na kutumia jumla ya Tshs. 18,078,633,980 kwa bajeti nzima ikiwa ni pungufu kwa asilimia 9 ya bajeti ya mwaka 2018/2019.

“Mchanganuo wa bajeti nzima ya Bilioni 18 ni mishahara Tshs. 13,955,112,840, matumizi ya kawaida Ruzuku (OC) Tshs. 602,415,612, mapato ya ndani Tshs. 1,636,958,528 na fedha za maendeleo Tshs. 1,844,147,000.” Alifafanua Kaunga.

 Mambo mbalimbali yamezingatiwa katika bajeti hiyo iliyopitishwa na baraza la waheshimiwa madiwani ikiwemo uzingatiaji wa sera na miongozo mbalimbali ya serikali na maelekezo mahsusi yaliyotolewa kwa Mamlaka za Serikali za Mitaa.