Mwenge Wawakumbusha Wazazi Wajibu Wao kwa Wanafunzi

Tarehe iliyowekwa: August 3rd, 2018

Wazazi wa Halmashauri ya Mji wa Kondoa wametakiwa kutimiza wajibu wao kwa kuwapatia mahitaji ya shule watoto wao ili waweze kusoma vizuri na kupata elimu iliyo bora.

Hayo yalizungumzwa na mkimbiza Mwenge kitaifa Bwana Charles Kabeho wakati akitoa ujumbe wa mwenge wa Uhuru baada ya kukabidhiwa kwa Halmashauri ya Mji wa Kondoa kutoka Halmashauri ya Wilaya ya Chamwino makabidhiano yaliyofanyika katika kijiji cha Msui.

“Wazazi hamuwezi kukwepa jukumu la kuwanunulia sare wanafunzi hasa wa Shule za Msingi ambao wengi utawaona wamevaa sare zimetoboka na mashati hayana vifungo tofauti na wanafunzi wa sekondari au kwa kuwa wao wanajitambua wanadai sare pindi zinapochoka?”Aliuliza Kabeho

Aliongeza kuwa kama Mwenge wa Uhuru kwa mwaka 2018 unasisitiza masuala ya elimu hivyo wazazi pia wana jukumu la kuhakikisha wanafunzi wanapata chakula shuleni ili kuwaongezea nguvu ambayo itapelekea kuongeza uelewa wanapofundishwa ambapo kwa sasa ni Mikoa ya Njombe na Kilimanjaro tu ndiyo inawapatia chakula shuleni wanafunzi kwa zaidi ya asilimia tisini.

Aidha aliwasihi wazazi kuwa karibu na watoto wao kwa kuwafuatilia mahudhurio yao shuleni na madaftari yao ili kujua iwapo mtoto ana tatizo na baadhi ya masomo na hatimaye aweze kuwasiliana na mwalimu wa somo husika na kumuelewesha ili  apate elimu bora na yenye manufaa kwa mtoto.

Hata hivyo aliwasisitiza wazazi kuhakikisha wanawapeleka watoto wao waliohitimu kwenye vyuo vya ufundi ikiwemo VETA na vyuo ya Maendeleo ya Jamii ili wapate ujuzi ambao utasaidia wao kujiajiri au kuajiriwa na kuendana na dhana ya nchi ya  viwanda na kuboresha uchumi kwa kufikia uchumi wa kati.

“Shule hii ina wanafunzi wachache sana ukilinganisha na shule zingine jambo ambalo halikubaliki wazazi hata kama wengi ni wafugaji hapa lakini wapelekeni watoto shuleni ni haki yao na ifikapo Januari 2019 hakikisheni watoto wote wanaenda shule ili wapate elimu ambayo ni ufunguo wa maisha yao na serikali imeendelea kuwekeza huko kwa kujenga madarasa, nyumba za walimu na maabara.”Alisisitiza Kabeho alipoongea na wazazi wa Kijiji cha Munguri.

Mwenge wa Uhuru umekimbizwa katika Halmashauri ya Mji Kondoa siku ya tarehe 2 Agosti ukitokea Wilayani Chamwino ambapo umepitia miradi saba kwa kuzindua, kuona na kuweka jiwe la Msingi miradi ambayo ni Afya, Elimu, Maji, Uvuvi na Vikundi ikiwa imewezeshwa kwa fedha za serikali na mashirika ya dini na wawekezaji binafsi.