"Simamieni sheria ukusanyaji wa mapato"- Mkurugenzi Mamba

Tarehe iliyowekwa: August 15th, 2022

Watendaji wa kata na mitaa Halmashauri ya Mji Kondoa wametakiwa kuzingatia sheria, kanuni na taratibu wakati wa kukusanya mapato ili kuepuka migogoro isiyokuwa na tija na wafanyabiashara.

Hayo yamesemwa na Mkurugenzi wa Halmashauri Paul Mamba wakati wa kikao cha kuweka mikakati ya kukusanya mapato kilichofanyika katika ukumbi wa mikutano wa halmashauri hivi karibuni.

"Nawasihi sana tukasimamie sheria na kuacha uzembe katika kukusanya mapato lakini pia msimwonee mtu wakati wa ukusanyaji wa mapato na watendaji wa kata mtendaji wa kata asiyewajibika mwambie ili ajirekebishe,"amesema Mkurugenzi Mamba

Aidha amemwagiza Mweka Hazina kuhakikisha anawapatia motisha watendaji hao wanapowasilisha mapato kwa mwezi ili kuwasaidia wakati wa ukusanyaji wa mapato na kuwafuatilia wote wanaochelewesha mapato.

"Tubadilike na tufanye kazi na kuyafanyia kazi yale tunayoagizana na ndio maana nimewaita leo mseme changamoto zinazowakabili ili turekebishe mapema na tunawekeana malengo ya ukusanyaji ili tufikie malengo tuliyojiwekea katika bajeti,"amesisitiza Mkurugenzi Mamba

Akiongea kwa niaba ya watendaji wengine Samson Mtui Mtendaji wa Kata ya Kondoa Mjini amesema wanaenda kusimamia yote waliyokubaliana na kuanza upya ili kufikia malengo ya Halmashauri.

Kikao cha watendaji kimefanyika ili kuimarisha na kupeana mbinu za ukusanyaji wa mapato ambapo Mkurugenzi amewasihi pia kuendelea kuiongelea agenda ya lishe katika mikutano ya maeneo yao ya utawala na kimehudhuriwa pia na Mkuu wa Idara ya Utumishi na Kaimu Mkuu wa kitengo cha Fedha.