TARURA Kondoa Mji Hawajaridhishwa na Barabara ya Kondoa Bolisa

Tarehe iliyowekwa: May 2nd, 2019

Wakala wa Barabara Vijijini na Mijini (TARURA) Kondoa Mji haijaridhishwa na kasi ya utekelezaji wa mradi wa ukarabati wa barabara ya Kondoa Bolisa unaotekelezwa na Mkandarasi Gona Company Limited.

Hayo yamesemwa na Meneja wa TARURA Kondoa Mji Mhandisi Bryton Kimaro wakati wa kikao cha Baraza la Waheshimiwa madiwani kilichofanyika katika ukumbi wa Chuo Cha Uuguzi na Ukunga Kondoa Mjini hivi karibuni.

Alisema kuwa wao kama wasimamizi hawajaridhishwa na kazi zinavyofanyika na wameshamwandikia mkandarasi kwa ajili ya kumkata fedha kila siku kwa muda wa siku mia moja na baada ya hapo taratibu zingine za kisheria zitachukuliwa.

“Alipaswa kumaliza kazi toka mwanzoni mwa mwezi Aprili hadi leo hii bado na tunategemea akamilishe kazi yake baada ya wiki mbili na amefanya maafikiano na tunayasimamia hayo.” Alieleza Mhandisi Bryton

Aliongeza kuwa barabara ya Kondoa Bolisa ni kubwa na mkandarasi huyo hatatatua tatizo lote kutokana na kibali kilichotoka ambapo mkandarasi huyo atajenga makalvati katika maeneo korofi na kufanya kazi zingine za kitaalamu ili kuhakikisha kuwa maji hayakatizi barabarani.

“Kama ofisi tumeona ili barabara ikamilike yote tumeandika andiko na kuliwasilisha makao makuu ambapo wanalifanyia kazi na tunaamini barabara ya Kondoa Bolisa ni kiungo muhimu kwa barabara ya kwenda Babati.”Alifafanua Mhandisi Bryton

Hata hivyo aliongeza kuwa serikali ina lengo la kuimarisha barabara zote ndani ya Kondoa Mji kulingana na upatikanaji wa fedha ila kwasasa bajeti bado finyu na wana imani itaboreshwa kadri siku zinavyosogea ikiwemo barabara ya Serya Mongoroma ambayo ilikwishafanyiwa matengenezo miaka ya nyuma.

Kikao cha Baraza la Waheshimiwa madiwani kimefanyika kwa ajili ya kujadili taarifa za utekelezaji kwa robo ya tatu kwa mwaka wa fedha  2018/2019.