TEA KUING'ARISHA KONDOA GIRLS

Tarehe iliyowekwa: December 18th, 2017

Mkurugenzi wa Halmashauri ya Mji Kondoa Khalifa Kondo ameishukuru serikali kwa kuitambua na kuitengea fedha shule kongwe ya wasichana ya Kondoa kwa ajili ya ukarabati wa shule hiyo.

Shukrani hizo amezitoa wakati wa kusaini mkataba wa utekelezaji wa ukarabati wa shule hiyo ofisini kwake ukishuhudiwa na uongozi wa bodi ya shule na wataalam mbalimbali wa halmashauri.

Amesema kuwa msaada huo umekuja katika wakati muafaka na kuwataka wataalam wote wa halmashauri kutoa ushauri kwa ukaribu panapohusika kwa kufuatilia na kuhakikisha taratibu za manunuzi zinazingatiwa ili mradi uwe katika viwangi vinavyotakiwa.

Aidha kwa upande wa Mwenyekiti wa Shule hiyo Bwana Amanuel Mkubwa ameishukuru sana serikali kwa msaada huo na kusema kuwa wao kama bodi peke yao hawawezi kutekeleza mradi huo mkubwa hivyo wanategemea sana ushauri wa wataalam wa Halmashauri ili mradi uwe katika viwango vinavyoendana na fedha iliyotolewa.

Hata hivyo kwa upande wa Afisa Elimu Sekondari Mwalimu Venance Mwizarubi amesema ukarabati huo utasaidia kwa kiasi kikubwa kuinua kiwango cha elimu kwani kwani walimu na wanafunzi na walimu watakuwa katika hali nzuri ya kujifunza na kufundishia tofauti na awali ambapo kuna changamoto kubwa ya uchakavu wa majengo na miundombinu.

Shule ya Sekondari ya Wasichana Kondoa ni moja ya shule kongwe iliyoanzishwa mwaka 1980 na ina jumla ya wanafunzi 670 ambapo imesaini mkataba wa ukarabati na Mamlaka ya Elimu Tanzania kwa gharama ya zaidi ya shilingi bilioni moja zitatumika chini ya mshauri wa mradi ambao ni Chuo cha Sayansi na Teknolojia Mbeya.