Jamii Yaaswa Kutumia Chumvi Yenye Madini Joto

Tarehe iliyowekwa: May 6th, 2018

Wajumbe wa kamati ya Lishe Halmashauri ya Mji Kondoa wameitaka jamii kuamka na kutumia chumvi yenye madini joto ili kuepuka matatizo wanayoweza kuyapata kwa kukosa madini hayo mwilini.

Wamesema kuwa wanajamii wengi wamekuwa wakitumia chumvi bila kujua kama ina madini joto au haina kutokana na mazoea ya kutohakikisha chumvi kwa kuipima kutokana na wengi kukosa uelewa wa umuhimu wa madini joto mwilini.

“Kuhakikisha iwapo chumvi ina madini joto mwananchi anatakiwa kuweka kiasi cha chumvi kwenye kijiko na kukamulia limao ambapo chumvi yenye madini joto hubadilika rangi na kuwa ya zambarau na chumvi isiyo na madini joto haibadiliki rangi.”Alisema Bwana Hassan Kiseto mmoja wa wajumbe walioshiriki kikao hicho.

Aidha aliongeza kwa kuzitaja faida ya kutumia chumvi yenye madini joto kuwa ni kuzuia ugonjwa wa goita, kuongeza uwezo wa kufikiri na kurahisisha mzunguko wa damu mwilini ambapo mgonjwa akikosa madini hayo husumbuliwa na magonjwa hayo.

Hata hivyo kamati hiyo ilipata fursa ya kutembelea bustani za mbogamboga na matunda zilizopo katika shule za Msingi Ubembeni na Miningani ambazo zinamilikiwa na shule kwa ajili ya kujiongezea kipato cha shule na kuboresha lishe za wanafunzi.

Kamati ya lishe hukutana kila baada ya miezi mitatu ambapo kikao hicho kilikuwa kwa ajili ya kujadili taarifa za hali ya lishe robo ya tatu kuanzia mwezi Januari hadi Machi 2018.