Wananchi Kondoa Mji watolewa hofu hati yenye mashaka

Tarehe iliyowekwa: May 20th, 2021

Na: Leah Joseph

Katibu Tawala Wilaya ya Kondoa Andrew Ng'wani amewatoa hofu wananchi wa Halmashauri ya Mji kondoa kutokana na kupata hati yenye mashaka kwa mwaka wa fedha 2019/2020.

Kauli hiyo ameitoa wakati wa kikao maalumu cha Baraza la Madiwani cha kupokea na kujadili taarifa ya utekelezaji wa mapendekezo yaliyotolewa na Mdhibiti na Mkaguzi Mkuu wa Hesabu za Serikali kwa mwaka 2019/2020 kilichofanyika katika ukumbi wa Halmashauri hivi karibuni.

"Wengi tumepokea kwa masikitiko taarifa ya Mdhibiti na Mkaguzi Mkuu wa hesabu za Serikali kuwa Kondoa ni miongoni mwa Halmashauri zenye hati yenye mashaka, niwatoe hofu kwamba hakuna kitu kilichoharibika na wala hakuna ubadhilifu wowote wa fedha za serikali uliofanywa na kiongozi yeyote ila ni changamoto ya takwimu ilijitokeza wakati wa uwasilishaji, "amesema Katibu Tawala.

Aliendelea kusema kuwa ana uhakika mwaka huu 2020/2021 Halmashauri ya Mji Kondoa itapata hati safi na kuondokana na sintofahamu inayojitokeza kwa watumishi pamoja na wananchi wote.

"Kama mlivyoona kuna mapendekezo 13 tumejadili yaliyo ndani ya uwezo wetu tutayafanyia kazi na ambayo yapo nje ya uwezo wetu  yatawasilishwa mahala panapohusika ili yaweze kupatiwa ufumbuzi,"amesisitiza Katibu Tawala Ng'wani.

Hata hivyo Katibu Tawala amewaambia wajumbe wa kikao hicho kuwa mwaka huu kuna mbio za mwenge wa Uhuru ambao unatarajiwa kukimbizwa wilayani Kondoa mwezi Julai mwaka huu.

"Niwaombe wajumbe wote pamoja na wadau kujitokeza kwa wingi katika kuupokea Mwenge wa Uhuru kwetu ni heshima kubwa sana kuna maandalizi mbalimbali yatafanyika hivyo kila mtu ajitokeze kutoa ushirikiano pale atakapohitajika kufanya hiyo, "amesisitiza Katibu Tawala Ng'wani.

Kwa upande wake Mwenyekiti wa Chama cha mapinduzi Wilaya ya Kondoa Bw. Hussein Kova amewataka watumishi na viongozi  wote kufanya kazi kwa umoja na kuziacha tofauti zao kwani hakuna binadamu aliyekamilika.

"Tuache kufanya kazi kwa majungu na kusengenyana kwani kufanya hivyo ni kuikwamisha Wilaya na Halmashauri katika maendeleo mimi kama mwenyekiti sipo tayari kuona haya yanatokea, "amesisitiza Bw. Hussein Kova.

Ameongeza kuwa kama mtumishi au kiongozi yeyote amekosea ananmahala pake pa kusemewa na sio kwenye magenge kwani kila kitu kinaongozwa na sheria kanuni na taratibu zake lakini pia ameonya kuachana na makundi  katika maeneo ya kazi na kwamba badala yake watu wafanye kazi kwa juhudi na kushirikiana.

Kikao maalumu cha Baraza la Waheshimiwa Madiwani kimefanyika ili kupokea na kujadili taarifa ya utekelezaji wa mapendekezo yaliyotolewa na Mdhibiti na Mkaguzi Mkuu wa Hesabu za Serikali kwa mwaka wa fedha 2019/2020 ambapo kiliongozwa na Mwenyekiti wa Halmashauri ya Mji Kondoa Mh. Mohamed Kiberenge na kuhudhuriwa na Katibu Tawala, Mdhibiti na Mkaguzi wa Hesabu za Serikali toka makao makuu,Kaimu Mkurugenzi, Waheshimiwa Madiwani, Kamati ya Ulinzi na Usalama,  Wakuu wa Idara na Vitengo, Viongozi wa Chama cha Mapinduzi pamoja na waandishi wa habari.