Wasira aelezea faida za Muungano kwa wananchi wa Kondoa

Tarehe iliyowekwa: April 26th, 2025

Makamu Mwenyekiti wa CCM Bara Ndg. Stephen Wasira ameeleza faida za Muungano wa Tanganyika na Zanzibar muda mfupi baada ya kuweka jiwe la msingi la ujenzi wa Shule ya Sekondari ya Suruke iliyopo Kata ya Suruke katika Halmashauri ya Mji Kondoa.

Wasira ameeleza kuwa Muungano unachochea na kuimarisha biashara baina ya pande mbili lakini pia unaleta aman kwani wananchi wa pande zote mbili wanauhuru wa Kwenda kuishi katika nchi hizo mbili bila masharti yoyote.

Aidha amewapongeza viongozi waasisi wa Muungano huo ambao ni Hayati Baba wa Taifa Mwalimu Julius Kambarage Nyerere na Hayati Rais wa Kwanza wa Serikali ya Mapinduzi Hayati Abeid Amani Karume kwa kuona mbali na kuziunganizha nchi hizi mbili ambapo matunda yake yanaonekana hadi leo.

Hata hivyo amewasihi wananchi kuendelea kuudumisha na kuuenzi Muungano huo ili kuendeleza maono ya viongozi waasisi na kudumisha amani na kukemea wote wanaobeza Muungano kwani hawana nia njema na maendeleo ya wananchi na nchi hizo mbili.

Hata hivyo Wasira ameongeza amewakumbusha wananchi wote ambao bado hawajajiandikisha katika Daftari la kudumu la mpiga kura kutumia fursa ya kujiandikisha itakapokuja awamu ya pili mapema mwezi Mei Ili kila mmoja apate haki yake ya kikatiba ya kuchagua kiongozi amtakaye katika uchaguzi Mkuu utakaofanyika mwezi Oktoba 2025.

Kwa upande wake Mkurugenzi wa Halmashauri ya mji Kondoa Ndg. Said Majaliwa akisoma taarifa fupi juu ya mradi huo kwa Makamu Mwenyekiti ametumia fursa hiyo kutoa shukrani za dhatI kwa Rais wa Jamhuri ya Muungano wa Tanzania Mhe.Dkt Samia Suluhu Hassan kwa kutoa fedha zaidi ya milioni 544 kwa ajili ya ujenzi wa Sekondari ya Suruke.

“Ujenzi wa Shule ya Sekondari Suruke umelenga kupunguza adha ya wanafunzi kutembea umbali mrefu kutafuta elimu lakini pia kutoa wigo mpana wa kila mtu kupata elimu Ili kuwa na kizazi kilichoelimika zaidi”amesema Mkurugenzi Majaliwa

Ziara ya Makamu Mwenyekiti wa CCM bara imefanyika wilayani Kondoa ikiwa ni maadhimisho ya siku ya Muungano wa Tanganyika na Zanzibar ambayo hufanyika kila tarehe 26 Aprili ya kila mwaka ambapo mwaka huu ni miaka 61 toka kutokea kwake na  kauli mbiu ya mwaka huu imesema “Muungano wetu ni Dhamana, Heshima na Tunu ya Taifa Shiriki uchaguzi mkuu mwaka 2025.